ازاي تطور مهارة المحادثة مجاناً

عايز تحسّن مهارات الـspeaking بتاعتك في الإنجليزي بس مش مناسب تستثمر في كورس محادثة حاليا؟ اقرا للآخر وهنقولك حل مشكلتك ايه مجاناً

 النهاردة هنتكلم عن أربع منصات هتساعدك تتكلم انجليزي وهنوضحلك إزاي تستخدم كل واحدة منهم علشان تحسن English speaking skills بتاعتك، وكمان شوية نصايح عالسريع علشان تستفيد منها لأقصى درجة، بالإضافة لمميزات وعيوب كل منصة.

Hello Talk (مش أحسن حاجه)

ابليكيشن هتقدر تلاقيه علي Google Play Store وموجود كمان علي iOS لو انت من علية القوم ومعاك ايفون.

فكرة البرنامج ده انه بيوصلك بناس بيتكلموا اللغة اللي انت حابب تدرسها وتعملوا تبادل لغوى، بمعنى أصح  "علمنى واعلمك"، بيوصلك بناس حابه تتعلم عربي وبتعرف تتكلم انجليزي وتتمرنوا مع بعض علي اللغتين وتساعدوا بعض تتطوروا، ممكن تكلمهم شات أو صوت وتتبادلوا اللغات. تعالى نشوف مميزات وعيوب الابليكيشن ده Hello Talk:

المميزات:

- التصحيح: احسن حاجه في الابليكيشن إن فيه خاصية إن الطرف التاني يصححلك اخطاءك.

- تبادل ثقافي: هتتعرف على ثقافات مختلفة وأفكار جديدة عشان بتقابل ناس من حوالين العالم كله.

العيوب:

- بروفايلات fake واستعمال البرنامج لاغراض أخرى: المفروض ان البرنامج بيوصلك بناس native speakers بس فيه مشكله هتقابلك ان فيه ناس بتعمل بروفايل fake وتتظاهر ان هي من أمريكا (غالبا بيكونوا هنود)، طبعا الناس بتعمل كده عشان بتستعمل الابليكيشن عشان -لا مؤاخذه في الكلمة- تشقط.

- العرض والطلب: لو لقيت حد فعلا native speaker عاوز يتعلم عربي، هتلاقي فيه 50 واحد بيكلموه غيرك، بيكون صعب جداً انك تلاقي شريك لغوي لو لغتك الأم مش ناس كتيره بتدرسها.

- عدم الانتظام: ألف مبروك لقيت حد واتصاحبتوا علي بعض؟ هنخش في اخر مشكله وهي ان عاجلاً ام آجلاً هيبقي فيه فتور في المحادثة والكلام كل يوم هيكون زي بعضه ومع الوقت حماسكم هيقل و طرف من الطرفين هيكسل فا الموضوع هيفكس.

- شخلل عشان تعدي: الابليكيشن مؤخرا بقي فيه اعلانات كتيره، لو عاوز تتواصل مع ناس اكتر او ناس اكتر تشوف البروفايل بتاعك بتحتاج تشترك في النسخه الـpremium بتاعت البرنامج.

Free4talk.com (مش وحش)

Free4talk.com هو موقع تقدر تستعمله في اي وقت من غير ما تسجل، بتدخل غرف محادثة صوتية مع ناس من كل أنحاء العالم، تجربتي معاه كانت مش وحشه، تعالي نشوفي المميزات والعيوب

المميزات:

-  مجانًي وسهل استعماله: مجرد بتخش علي الموقع وتختار اي غرفة صوتية وتعيش حياتك.

- تواصل مع ناس من كل أنحاء العالم: هتقابل ناس من دول مختلفه وتقدروا تتعرف اكتر علي ثقافتهم وتعرفهم علي بلدك.

العيوب:

- الجنسيات: معظم الناس علي الموقع من الهند أو من دول تانيه ومش native speakers، ده مش مشكله بالنسبه لك عشان  انت طالع تـpractice بس، ما تخليش ده يوقفك من الممارسه، مش فارقه بتتكلم مع مين وفيه منهم ناس مستواها كويس جداً.

- صعوبة في البداية: لو بتتكثف 👈👉 ممكن الموضوع يكون صعب شوية تتكلم مع ناس ما تعرفهمش، مع الوقت بتظبط جمد قلبك.

- عدم الاستمرارية: الناس في الغرف مش دايمًا متاحة لمحادثات طويلة وبتخرج منهم بعد فتره، نسبه انك تطلع من الموقع ده بأصدقاء تتمرن معاهم لفتره طويله قليل شويه

ChatGPT (الاختيار الامثل للناس اللي بتتوتر أو مش واثقه في نفسها)

شات جي بي تي اختيار كويس جداً للناس اللي عندها تروما من مدرسين الانجليزي أو لسه مش واثقه في مهاراتها،  تقدر تستعمله لحد ما ثقتك في نفسك تزيد وبعدين تبتدي تخرج من الكومفورت زون تدريجياً وتتكلم مع بني آدمين

 (ملحوظة: الفويس شات متاح بس علي الابليكيشن، الموقع مفيهوش امكانيه التحدث مع شات جي بي تي صوتياً). 

المميزات:

All English, All The Time: تقدر تتكلم مع شات جي بي تي في وقت وفي اي حاجه.

تصحيح الأخطاء: بيصححلك الأخطاء ويديك فيدباك.

بدون إحراج: مش هتحس بالإحراج لو غلطت..

العيوب:

- مش تفاعلي زي البشر: مش هيكون زي التفاعل مع شخص حقيقي.

- محدودية السياقات: ممكن مايفهمش حاجات كتير.

- احيانا بيكون غبي: هو ذكاء اصطناعي بس احيانا بيكون غبي وبيرد ردود غبية، شات جي بي تي محتاج "تمرين" كتير من ناحيتك عشان يفهم انت عايز ايه منه بالظبط، لما يديك اجابه أو رد مش مناسب بتحتاج توضح له كذا مره إنك عايزه يرد رد محدد، لازم الprompt بتاعك يبقي كويس وتستمر في تمرينه عشان تاخد نتائج كويسه.

إزاي تبدأ مع ChatGPT؟

احنا كتبنا لك prompt تقدر تستعمله مع شات جي بي تي بحيث تحقق نتايج كويسه معاه، ممكن تاخد الprompt ده كوبي بيست وتحطه في الابليكيشن، ممكن تعدل شوية علي الprompt بما يتناسب معاك ومع احتياجاتك:

Role: Expert English teacher and speaking practice facilitator.

Topic: Feel free to choose to choose the topic and feel free to change the topic whenever the conversation starts dying.

Style: Casual and friendly, be a little bit humorous, not too flowery or too enthusiastic.

Language: Simplify your language so that it's suitable for my English level, my English level is B1. 

Linguistic feedback: Give corrections on sentence structure, lexis, pronunciation and grammar only whenever necessary. Do not give too much feedback so as to not discourage me from speaking. 

Steps: Initiate the conversation with a question related to the topic. Wait for me to answer and give feedback if necessary, then reply with brief follow-up questions. Encourage me to share my thoughts and opinions. 

Reply with OK if you understand, wait for me to say "let's start practicing" and then initiate the conversation.

Discord (الابليكيشن المجاني الأفضل بلا منازع)

Discord برنامج تقدر تنزله علي الموبايل أو على الكمبيوتر، المنصة دي أحسن منصة ممكن تستعملها عشان تتعلم لغات وتقابل ناس من دول مختلفه، فكرة ديسكورد هو ان الناس بتقدر تعمل communities بناء على اهتماماتها، الcommunities دي اسمها servers، كل الاعضاء في السيرفر بيكون اهتماماتهم مشتركه فا بتقدر تلاقي ناس شبهك عليه، في المقال ده هنقولك ازاي تستعمل servers الانجليزي واللغات في ديسكورد وهنبقي نخصص مقاله تانيه عشان تكتشف سيرفرات اكتر بناء على اهتماماتك وهواياتك، خلينا الاول نتكلم علي الايجابيات والسلبيات.

المميزات:

- مجتمع نشط: فيه ناس كتير بتشارك يوميًا وتقدر بسهوله تتعرف علي ناس جديده هناك لو بتستعمل البرنامج باستمرار وكنت active علي السيرفر..

- البيئة الأمثل لتعلم اللغات: فيه قنوات صوتية ونصية للمحادثات، وجودك علي ديسكورد سيرفر الناس بتتكلم فيه انجليزي هي البيئة المناسبه والكافيه لإحداث طفرة في مستواك اللغوى..

العيوب:

- صعوبة في التعود على البرنامج: البرنامج ممكن يكون صعب استعماله والتعود عليه، هتحتاج علي الاقل نص ساعه عشان تفهم تستعمله ازاي، أول ما تخش اي سيرفر هتلاقي فيه قنوات كتيرة وممكن تحس انك مش عارف تبدأ منين..

- صعوبة لغويه في الأول: معظم الناس اللي بتستعمل ديسكورد شباب، هتلاقى اللغة اللي بيستعملوها صعب شويه تفهمها لو انت مش بتستعمل الانترنت كتير ومش هتفهم الslangs والهزار اللي بيهزروه، مع الوقت هتفتهم بس متخليش ده يحبطك.

- هتحتاج تواجه مخاوفك: لما تخش الrooms اللي الناس بتتكلم فيها ممكن هتحس بالخوف انك تتكلم قدامهم بالذات لو بيتكلموا انجليزي كويس، مع الوقت ده الخوف هتتجاوزه، بس لازم تبتدي وتاخد خطوه، لو عندك رهاب اجتماعي انصحك تستعمل شات جي بي تي الأول بعدين تستعمل ديسكورد.

ترشيح سيرفرات:

 - تقدر تستعمل الservers دي عشان تتمرن على الconversation، بننصحك انك تنزل البرنامج الأول على الكمبيوتر بتاعك او على الموبايل قبل ما تخش السيرفرز دي، خش في التلاته بعدين استعمل واحد منهم بس (اللي تحسه مناسب بانسبه لك). 

1- English (600k+ members)

2- The English Hub (200k+ members)

3- Refold English (10k+ members)

نتمني تكونوا استفدتوا من المقاله، لو عندكوا أي اسأله ما تترددوش انكوا تسيبولنا كومينت!

ولو حابين تعرفوا أكتر عن كورس المحادثة بتاعنا تقدروا تعرفوا أكتر من هنا، الكورس بتاعنا بيختصرلك مجهود نفسي ومحاولات كتيرة مش بتكون ناجحه لأسباب كتيره (زي ايجاد بيئة آمنه وماتريال المناسبة والمتابعة وتصحيح الاخطاء المستمر)