اوعي تتعلم انجليزي بالطريقة دي

ما ينفعش تبقى "غشيم" وانت بتتعلم انجليزي!

 بشوف ناس كتيرة جداً بياخدها حماس البدايات ويبتدوا يذاكروا انجليزي بطريقة غشيمة (وبشوف للأسف مدرسين برضه بيرشحوا الطريقة دي)، طيب طرق غشيمة زي ايه؟ 

- تمسك القاموس وتحفظه صحفة صفحة

- تمسك كتاب بالانجليزي وتترجم كل كلمة جديدة عليك

- تشوف فيلم او فيديو وتطلع منه كل الكلمات اللي متعرفهاش

لو انت جربت الطرق دي وما نجحتش معاك هقولك علي طريقة أسرع وأسهل وأحسن ليك ولسلامتك العقلية والنفسية. 

كل الطرق دي ببساطه ما بتنفعش عشان بتبقي overwhelming، "بتكتسب" كم هائل من الكلمات في فترة قصيرة جداً بعدين مش بتراجع عليها فا بتنساها، الموضوع بيكون صعب بشكل لا داعي له وطريقة المذاكرة دي زي واحد داخل الجيم جديد وبيدور على اتقل وزن يشيله، هيحصل حاجتين ملهمش تالت، يا اما هتحس بالاحباط عشان ما قدرتش تشيل الوزن ده، أو هتشيل الوزن ده فعلاً وتتصاب. 

عشان تتعلم انجليزي لوحدك بشكل صحيح محتاج تفهم يعني ايه I+1 وازاي تختار مصادر مناسبة لتعلمك.  

إيه هو I+1؟

في عالم تعلم اللغات، فيه مفهوم اسمه I+1. الـ "I" هنا بيمثل مستوى اللغة الحالي بتاعك، والـ "+1" بيمثل المستوى اللي أعلى منك بشوية. يعني، الـ I+1 هو مستوى اللغة اللي فيه تحدي بسيط ليك، بس مش صعب لدرجة إنه يحبطك. الفكرة هنا إنك دايمًا بتتعلم حاجة جديدة بشكل مريح وتدريجي.

لو هنصيغ الكلام ده بشكل مبسط، اختار مصادر تكون فاهم 80 او 90% منه على الأقل و"ذاكر" ال10% اللي مش فاهمهم بس.

ازاي تلاقى مصادر مناسبة لمستواك؟

المصادر كتيرة ولكن مش حابين نشتتك، هنختار لك أحسن مصادر للقراءة والاستماع من وجهة نظرنا.

مصادر للقراءة:

ابليكيشن iStoria : ابليكيشن عبقري بيحقق مفهوم الـ I+i اللى اتكلمنا عليه عن طريق قصص قصيرة معاها اوديو (يعني ممكن تتمرن كمان على مهارة الاستماع)، اول ما بتنزل التطبيق بيتم اختيار مستواك وتحديد ماتريال للقراءة مناسبة لمستواك الحالي، الابليكيشن مجاني تماماً وسهل استعماله، نرشحه بشده!

موقع Engoo: لو مش بتحب تقرا قصص اكتر وبتحب تقرا مقالات في مجالات مختلفة، نرشحلك الموقع ده، كنز من الماتريال، المقالات حالياً معاها أوديو برضه فا ممكن تتمرن علي الاستماع والقراءة مع بعض. 

موقع News In Levels: كويس لو بتحب تقرا أخبار كل يوم، بيكون فيه أخبار بشكل يومي وبيتم تبسيط اللغة المستعملة في كتابة الخبر ل3 مستويات، برضه بيكون في اوديو تراك مع كل خبر، انا شخصياً بفضل Engoo. 

مصادر للاستماع: 

للمبتدئين تماماً (مستويات A1-A2): دايماً بنرشح فيديوهات TPRS للمبتدئين، تقدروا تشوفوا التشانل دي على يوتيوب

للمستويات المتوسطة (B1-B2): هنا ابتدي شوف محتوى انت بتحبه بس بالانجليزي، ارجوك ما تتفرجش علي مدرسين أو قنوات تعليم انجليزي تاني، شوف بتحب ايه واتفرج عليه، لو مش لاقي ماتريال مناسبه لمستواك واهتماماتك بنرشحلك موقع voicetube، فيه كاتالوج كبير من الفيديوهات متقسمة على حسب المستوى والtopic بتاعها. عاوزين نفكرك إن بالذات في مستوى B1 هيكون صعب تفهم محتوى لأجانب بشكل كويس في الأول، اصبر علي نفسك وحاول تلاقى مصادر لماتريال انت بتحبها وفي نفس الوقت تكون سهله عليك، مع الوقت مهارة الاستماع عندك هتتحسن وهتكتسب كلمات اكتر. 

ختاماً

افتكر دايماً ان تعلم الانجليزي مش سباق ولكن ماراثون، خليك صبور واستمر في بذل مجهود بشكل يومي، الاستمرارية دايماً هي الحل، ولو محتاج مساعده في اختيار ماتريال مناسبه لمستواك اعرف انك دايماً تقدر تبعتلنا مسج علي الواتساب واحنا هنساعدك مجاناً!