رحلة تعلم اللغات: من الصفر لحد الطلاقه - صحح مفاهيمك وتوقعاتك

ازيكم يا جماعة، كلنا عارفين إن تعلم لغة جديدة مشوار طويل، شخصيا بحب احاول اقرب المفهوم ده للناس عن طريق مقارنة تعلم اللغة بإنك تروح للجيم، بتحتاج تلتزم لفترة طويله لحد ما تبتدي تلاحظ تطور ملحوظ وتبص في المرايه وتتبسط بالمجهود اللي بذلته 

اكتر سؤال بنسمعه كمدرسين: "هقعد قد إيه لحد ما اعرف اوصل لمستوى كويس؟" السؤال ده للاسف بيكون صعب اجابته لإن "مستوى كويس" بيكون على حسب تعريفك للمستوى الكويس وانت باديء منين اساساً وتعرف ايه وما تعرفش ايه، فا لازم يكون عندك فكره عن مستواك الحالي والمستوى اللي عاوز توصل له، السؤال الأدق اللي احنا جايين نجاوب عليه النهارده هو "انا مستوايا كذا هحتاج وقت قد ايه عشان اوصل لمستوى كذا؟"

يعني إيه التعلم الموجه؟

وفقاً لدراسة من كامبريدج (تقدر تقراها بنفسك من هنا) الانتقال من مستوى لغوى لمستوى لغوى تاني بيحتاج عدد ساعات معين من التعلم الموجه، التعلم الموجه هو التعلم اللي بيتم تحت إشراف مدرس أو من خلال موارد تعليمية مناسبة لمستوى الطالب، التعلم الموجه. بيوفر للطلاب توجيه واضح، وفيدباك وتصحيح للأخطاء.

الدراسات بتقول إن التعلم الموجه أكثر فعالية من التعلم الذاتي، لأن المدرس بيساعد على تسريع العملية التعليمية ويضمن إن الطالب ماشي على الطريق الصحيح، ولكن ده لا يقلل من أهمية التعلم الذاتي وبنشجعك بشدة تذاكر لوحدك لو مش مناسب معاك تاخد كورسات دلوقتي.

طيب إيه المستويات دي؟

اي لغة بتنقسم ل6 مستويات وكتبنا مقاله مفصله عن المستويات دي تقدر تقراها من هنا، باختصار المستويات بتتقسم من A1 (مبتدئ جدًا) لحد C2 (محترف يعني مفيش أحسن من كده). وكل مستوى ليه عدد معين من الساعات اللي هتحتاجها علشان توصله. ودي مجرد أرقام تقديرية، يعني مش لازم نمشي بالورقة والقلم.

الوقت اللي هتاخده عشان تنتقل من مستوى للتاني:

لو هنحط قاعده مبدأيه نمشي عليها كده، عشان تنتقل من مستوى لمستوى تاني بتحتاج حوالي 200 ساعة من التعلم الموجه

من الصفر لـ A1:

هتحتاج حوالي 90 لـ 100 ساعة من التعلم الموجه. في المرحلة دي، هتبدأ تتعلم الأساسيات زي التحيات، الأرقام، والعبارات البسيطة. هتبقى قادر تطلب الأكل، تسأل عن الاتجاهات، وتتكلم شوية عن نفسك.

A1 لـ A2:

هتحتاج حوالي 100 ساعة من التعلم الموجه. هنا هتبدأ تتعلم التحدث عن مواضيع أكتر تعقيدًا زي الهوايات، الشغل، والأسرة. هتبقى قادر تفهم النصوص القصيرة وتتكلم في محادثات يومية بسيطة.

A2 لـ B1:

هتحتاج حوالي 150-200 ساعة. هتبقى قادر تناقش مواضيع متنوعة، وتفهم الأفكار الأساسية في النصوص المعقدة شوية، وتتفاعل مع المتحدثين الأصليين بثقة أكبر.

B1 لـ B2:

وفقًا للمجلس الثقافي البريطاني، هتحتاج تقريبًا 200-250  ساعة من التعلم الموجه. هنا هتبقى قادر تفهم نصوص أكاديمية ومعقدة، وتتكلم بطلاقة في مواضيع متقدمة، وتستخدم اللغة في المواقف المهنية والأكاديمية.

B2 لـ C1:

المجلس الثقافي البريطاني بيقول إن المرحلة دي بتاخد حوالي 200 ساعة. هتبقى قادر تفهم نصوص أكاديمية ومعقدة، وتتكلم بطلاقة في مواضيع متقدمة، وتستخدم اللغة في المواقف المهنية والأكاديمية.

C1 لـ C2:

بقى هنا بنتكلم في200 ل400 ساعة، في المستوى ده هتبقى قادر تتكلم بطلاقة وتفهم الأفلام بدون ترجمة، وتكتب نصوص معقدة وتفهمها بدون مشكلة.

تقدر تتاكد من صحة  الكلام ده من هنا.

مشوارك هيكون عامل ازاي؟

احسن مشوار هو مشوار الصفر لحدB1، في الرحلة دي بتكتسب اللغة بسرعه جداً وكل حاجه بتكون جديدة عليك، بتشوف تطور سريع في مستواك وبيكون لسه عندك "حماس البدايات"

أصعب جزء في الرحلة هو الانتقال من B1 لمستوى B2 ودي حاجه اسمها "الفجوة المتوسطة" أو الـ Intermediate Plateau ودي المرحلة اللي بتحس فيها إنك واقف مكانك مش بتتعلم حاجة جديده، مش بتتقدم. وبتحس انك مش بتقول غير نفس الكلام، المرحلة دي طبيعية جدًا، ومع الوقت هتعدي منها. أهم حاجة تستمر في التعلم وماتحبطش. تقدر تقرا المناقشة دي لو انت حاسس انك في "الفجوة" دي.

ختاماً: تعلم اللغة ماراثون مش سباق

تعلم اللغة رحلة طويلة ومش سهلة، محتاجه نفس طويل. خليك صبور ومواظب، أهم حاجه المواظبة ومع التدريب المستمر والصبر هتوصل، واستمتع بالرحلة بتاعتك، حاول تتعلم بالطريقة اللي تناسب شخصيتك واهتماماتك، بنتمنى لك كل التوفيق!