السر اللي هيخليك تتكلم زي الأجانب

إنت مش محتاج كورس نطق، انت مجرد محتاج تسمع وتقلد. 

هنتكلم شويه عن الشادوينج تيكنيك shadowing technique، ممكن تحس انه حاجه كبيرة وصعبه، ولكن في الحقيقة هي أسهل وأحسن حاجه تقدر تعملها عشان تحسن نطقك، تعالى نشوف ايه هو الـtechnique ده مع بعض!

لو مش عارف فا كلمة shadow في الإنجليزي يعني "ظل"، ببساطة مطلوب منك تقلد المتحدث الأصلي للغة اللي عايز تتعلمها. يعني بتسمع الشخص بيتكلم وتحاول تكرر وراه بنفس السرعة ونفس طريقة النطق. الفكرة إنك تبقى زي "ظله" وتكرر وراه على طول، علشان تتعلم ازاي ينطق الكلمات والجمل بطريقة صحيحة.

إزاي تبدأ؟

اختار: 

اختار محتوى مناسب ليك: ابدأ بحاجة بسيطة ومش صعبه عليك، يا ريت تختار فيديو انت فعلا عاجبك او متحدث انت حاسه charismatic وعاوز تتكلم زيه، ما تختارش تقلد حاجه انت مش شغوف تجاهها عشان اما تبص علي النتيجة النهائيه تبقى مبسوط، بعد ما تختار الفيديو هتحتاج تجيب السكريبت بتاعه، هنقولك كل المصادر في آخر المقاله دلوقتي بس عاوزين نركز علي الـknow how.

اسمع: 

البس سماعاتك واسمع الفيديو كويس وحاول تفهمه. لو في كلمة مش فاهمها، وقف الفيديو وادور على معنا، لازم تكون فاهم معنى الكلام اللي بيتقال عشان تفهم مشاعر المتحدث الأصلى وتحاول تقلدها.

كرر:

 شغل الفيديو تاني وحاول تكرر كل جملة ورا الشخص اللي بيتكلم، تشغل الفيديو تسمع الجملة وتقلدها بعدين تكمل، لازم تواكب سرعته في الكلام وتقلده بالمللي، احنا مش مجرد عاوزين ننطق الكلام بشكل صحيح، كمان عاوزين نقلد صوت الشخص ونغمته وطريقه كلامه، لو شخص بيتكلم بسرعه هيكون صعب عليك شويه انك تواكب سرعته أفضل حاول كتير لحد ما تزبط معاك.

اتمرن:

 لما تيجي تعمل شادوينج لازم تعرف ان دايما quality over quantity بمعنى مش عايزين نعمل شادوينج لفيديو 10 دقايق في نص ساعه، لا بالعكس، عاوزين نعمل شادوينج لدقيقه واحده ونفضل نتدرب عليها لمدة نص ساعة أو ساعة، لازم نطقك يبقي perfect عشان كده يفضل تختار حاجه قصيره وتركز في أدق التفاصيل في نطق المتحدث.  اتمرن على الأقل لمدة نص ساعه علي كل دقيقة، سجل لتفسك كل شويه وانت بتقلد وقارن نطقك بنطق المتحدث الأصلي، اسمع وشوف محتاج تغير ايه وغيره.

أحسن طريقة تعمل بيها shadowing ايه؟

طيب عشان تسهل الموضوع، مش محتاج تشتغل بطريقه بدائيه وفيه ابليكيشنز ومواقع معموله مخصوص عشان تعمل شادوينج، اختار ابليكيشن أو موقع واحد بس واستعمله، يفضل تستعمل الكمبيوتر بتاعك ولكن لو معندكش كمبيوتر مافيش مشكله.

1- Language Reactor (صعب الاستعمال - للكمبيوتر فقط) 

 ده مش برنامج او موقع، ده browser extension بيشتغل مع يوتيوب ونيتفلكيس ومواقع كتيره جداً، extension ممتاز بس مشكلته انه صعب استعماله شويه، برشحه بشدة لو معندكش مشكله تتعلم تستعمله ازاي وليك شويه في التكنولوجيا، تقدر تتعلم منه فوكاب وبيترجم وبيعمل كل حاجه انت محتاجها، ميزته عن باقي الابليكيشنز والمواقع انك تقدر تستعمله عشان تشوف أي فيديو انت حابه ومش بتكون مقيد بشويه فيديوهات معينه.

2- Voicetube (سهل استعماله) - للكمبيوتر او الموبايل

موقع الكتروني وفيه ابليكيشن للموبايل، ميزة الموقع ده إن فيه مكتبة ضخمة من الفيديوهات متقسمة على حسب مستوى اللغة المستعملة في الفيديو وعلى حسب محتوى الفيديو سواء كان ترفيهي أو سياسي أو اقتصادي..إلخ، كمان تقدر تدوس على أي كلمة انت مش فاهمها وبيجيبلك ترجمتها، ترشيح ممتاز لو عاوز حل سهل الاستخدام وسريع، العيب الوحيد بس إنه علي عكس language reactor بتكون مقيد بالمكتبة اللي موجودة علي الموقع (ولكنها كافية جداً).

  3- الطريقة البدائيه (تفضيل شخصي)

طريقة انا بفضل أعملها هي إني بجيب الفيديو من علي يوتيوب وبعدين اجيب السكريبت بتاعه من خلال الموقع ده، باخد السكريبت واحطه في ملف وورد واسمع المتحدث الأصلى واحط notes لنفسي واغير لون الكلام وأخليه bold/underlined، الطريقة دي بتساعدني انتبه لمشاعر المتدث والنغمة بتاعته (بكتب مثلا: هنا المتحدث منفعل بيعلي صوته، هنا طول شويه في نطق المقطع ده، هنا بيتكلم بهدوء، محتاج اربط الكلمتين دول ببعض، خلي بالك هنا بينطق الكلمة دي بالطريقة دي، الحرف ده silent وهكذا..)، ممكن تجربوها ولكن انا شايف نبسط الأمور على نفسنا بالذات في الأول عشان ما نحسش الموضوع تقيل علينا. 

تقنية الظل من أحسن الطرق اللي ممكن تساعدك تتعلم الإنجليزي وتطور نطقك بسرعة. صحيح ممكن تكون صعبة شوية في الأول، بس مع الوقت هتلاقي نفسك بتحسن وبتتكلم بطلاقة أكتر. جرب الطريقة دي وشوف الفرق بنفسك وما تخليش حد من Egypt يشوف نفسه عليك، ولا مدرس يحسسك إنك نطقك وحش، انت تمام اتمرن شويه بس!

وبكده نكون وصلنا لنهاية مقالتنا، جربوا التكنيك ده وقولولنا رأيكم في التعليقات. ولو عندكم أي استفسار، تقدروا دايماً تسيبولنا كومينت أو تتواصلوا معانا من خلال الواتساب!