حل أزمة من أزمات العرب في النطق النهارده هو حل لمشكلة نطق الـb/p
مشكلتنا كعرب إن الصوت الأول موجود في لغتنا، وهو صوت الـ "ب"، زي ما بنقول كلمة زي "بحبك" مثلا، الصوت التاني وهو الـ"p" مش موجود ولكنه بيتنطق بنفس الطريقه تقريباً، نفس وضعية الشفايف ونفس وضعية لسانك وبقك (فمك) بس فيه حاجه واحده بس مختلفه. قبل ما نبتدي عاوزين نجرب تمرين مع بعض:
عاوزك تلاحظ انت بتنطق حرف الـ "ب" ازاي، قول "ب" كذا مره ورا بعض ولاحظ شفايفك بتكون عامله ازاي وبتحرك بقك (فمك) ازاي، هتلاحظ ان شفايفك بتكون مضمومه ومقفوله وبعدين بتفتحهم مره واحده وتطلع الصوت ده.
الصوت الأول: "/b/"
طيب الصوت ده أحنا أصلا بنعرف نعمله ومش محتاجين مساعده فيه، مش هنضيع وقت هنا. الصوت ده بيكون في كلمات زي:
book - ban - ball
الصوت التاني: "/p/"
الصوت ده طريقة نطقه زي الـ"ب" بالظبط ولكن فيه فرق واحد بس، إنك هنا بتطلع هوا من بقك، انت بتضم شفايفك علي بعضهم وبعدين تفتحهم وتطلع هوا، الفكرة كلها في الهوا اللي بيطلع ده، حط ايدك قدام بقك وقارن صوت الـ"b" (فيه هوا بيطلع من شفايفك بس مش كتير)، وبعدين اعمل صوت الـ"p" (لازم لازم تطلع هوا كتير عشان تنطقه بشكل صحيح) نرشح بشده طريقة "الورقة عشان تتمرن على نطق الصوت ده، هات ورقة وطبقها كذا مره عشان متتهزش بسهوله، جرب تنطق كلمة paper بطريقة صحيحة وطريقة خاطئة عشان تلاحظ الفرق. لازم الورق تتهز مرتين وانت بتنطق حرف الـp.
إزاي تصلح نطقك للصوتين دول؟
إتمرن على التمييز ما بينهم الأول
لو إنت حاسس إن الصوتين شبه بعض لما تيجي تسمعهم فا لازم تتعلم تميز ما بينهم الأول لحد ما الفرق يكون واضح ما بينهم، خد الخمس جمل دول كوبي بيست واسمعهم من جووجل ترانسليت لحد ما تلاحظ الفرق، اسمع الريكورد ده للـminimal pairs دي، اسمع وميز الأصوات الأول، بعدين قلد، بعدين سجل لنفسك وقارن نطقك بالنطق الصحيح.
bat - bet - bin - big - bad - ball - bill - bark - best - bow
pat - pet - pin - pig - pad - pall - pill - park - pest - pow
اتمرن على tongue twisters
الـtongue twisters هي جمل زي "ارنبنا في منور أنور"، بتساعد بشده في تحسين نطقك، اتمرن على الـtongue twisters بنفس الأسلوب، هنسمع الأول ونميز الأصوات، بعدين نقلد، بعدين نسجل ونقارن نطقنا بالنطق الصحيح.
- Bobby bought a big blue balloon for the party.
- Patty picked a purple pen from the pencil box.
- The puppy played in the park while Billy baked a pie.
- Peter put a picture of a parrot on the board.
- Betty's brother brought a bag of popcorn to the picnic.
لسه مش متأكد من نطقك؟
تقدر تبعتلنا فويس نوت مجاناً علي واتساب بعد ما تتمرن واحنا هنقولك بقيت تنطق بشكل صحيح ولا لا ونحاول نساعدك تتقن الصوتين دول، تواصل معانا علي واتساب.